Sliding Door

              Ang sliding door ay isang klase ng pintuan na bumubukas ng pahalang sa pamamagitan ng pagpapadulas  ng mismong pinto sa riles kung saan ito naka-puwesto. Kadalasan ang sliding door ay clear o gawa sa salamin.

                Sa pamamagitan ng sliding door na clear ay madali nating nakikita ang mga bagay na nasa kabilang kuwarto. Kapag ito ay nakabukas, maari itong maging daan upang pasukin pa ang ibang kuwarto samantala, kapag ito ay nakasara ito ay isang harang na humahadlang upang makapasok tayo sa iba pang  kuwarto.

                Ang sliding door ay maaring maging namamagitan hindi lamang sa mga kuwarto sa isang bahay kundi, maaring rin itong ihalintulad sa mga ‘namamagitan’ sa atin sa ating buhay.

                Tulad ng sabi ni Gabriel Marcel na ang katawan ay maaring gamitin bilang namamagitan.-Namamagitan sa paraang nagkokonekta(tulay) o namamagitan sa paraang humahadlang (sagabal), sa ating buhay ay mayroon tayong mga tinatawag na sliding door o mga factor na makaapekto sa atin sa pamamagitan ng pagiging tulay o sagabal sa pagkamit natin ng kung anuman gusto nating makamit.

                Maaring ang sliding door ay maihalintulad sa opportunities sa ating buhay. Ito ay sliding door na nakabukas kapag ating pinipili na subukan ang mga bagay-bagay kahit na kadalasan ay wala tayong kasiguraduhan sa maaari pang mangyari sa susunod. Sa pamamagitan ng pagbubukas ng sliding door ng ating buhay, nararanasan natin ang buhay. Samatala, ito ay nakasara kapag pinipili nating iwasan ang mga bagay dahil tayo ay natatakot sa uncertainty  ng buhay at dahil dito, hinahadlangan natin ang ating sarili na danasin ang buhay.

                 Tayo ay may sariling desisyon sa ating buhay. Nasa sa atin kung ating pipiliin na danasin ang mga nasa paligid natin. Nakikita natin ang mga nangyayari sa ating paligid at nasa sa atin kung pipiliin natin na manatili sa ating comfort zone at pagmamasdan na lamang ang pangyayari o magtetake ng risks at aaksyunan ang mga bagay-bagay.

                Kadalasan ay pinipili nating makulong sa likod ng nakasarang sliding door imbis na buksan ito at pasukin ang ibang mundo upang maranasan ang dapat nating maranasan. Marahil ay may iba’t ibang factors na nakakaapekto sa ating desisyon sa buhay pero nasa sa atin parin kung paano tayo magpapaapekto sa mga factors na ito. Sa huli, tayo parin ang makapagsasabi kung papaano natin ginamit ang mga sliding door o mga namamagitan sa buhay natin.